Дзяржаўны
каталог Музейнага фонду
Рэспублікі Беларусь

Навіны музейнага жыцця



18.02.2013 |  Выстава аднаго дня. 18 лютага нарадзіўся Міхаіл Савіцкі
  18 лютага 1922 г. нарадзіўся народны мастак і Герой Беларусі Міхаіл Савіцкі.
  Мастак працаваў ў галіне станкавага і манументальнага жывапісу. Для яго творчасці былі характэрны публіцыстычнае, эмацыйна-экспрэсіўнае раскрыццё гістарычных і сучасных тэм.
  Творы Міхаіла Савіцкага захоўваюцца ў калекцыях многіх беларускіх музеяў, у тым ліку ў Нацыянальным мастацкім музеі Рэспублікі Беларусь, Брэсцкім абласным краязнаўчым музеі, Музеі гісторыі горада Мінска. Менавіта ў фондах гэтых музеяў захоўваецца жывапіс, прадстаўлены на новай віртуальнай выставе ад супрацоўнікаў Цэнтра Дзяржаўнага каталога.  

13.02.2013 |  Выстава аднаго дня. 13 лютага - Сусветны дзень радыё
 
  Упершыню Сусветны дзень радыё адзначылі ў 2012 годзе. Дата правядзення абрана не выпадкова - менавіта 13 лютага 1946 г. упершыню выйшла ў эфір "Радыё ААН". 29 верасня 2011 г. ЮНЕСКА падтрымала ініцыятыву іспанскай Акадэміі радыё аб абвяшчэнні новага святочнага дня.
  На віртуальнай выставе прадстаўлены радыёпрыёмнікі, якія належалі Якубу Коласу, і радыёпрыёмнік з калекцыі Магілёўскага абласнога краязнаўчага музея імя Е.Р. Раманава, які выкарыстоўваўся магілёўскімі падпольшчыкамі для праслухоўвання зводак Савінфармбюро.



09.02.2013 |  Выстава аднаго дня. 9 лютага - Міжнародны дзень стаматолага
   9 лютага святкуецца Міжнародны дзень стаматолага.
   Свята зубных лекараў прыпадае на дзень шанавання каталіцкай царквой хрысціянскай пакутніцы Апалоніі Александрыйскай, атрыбутамі якой згодна з характарам пакут, сталі зубы ці абцугі. Існуе павер'е, што варта вымавіць "Santa Apollonia!», і зубны боль адступіць.
  Стаматалогія з'яўляецца адной з самых старажытных галін медыцыны: раскопкі ў пакістанскай правінцыі Белуджыстан выявілі
астанкі людзей, якія жылі 7 - 5,5 тысяч гадоў да нашай эры, у іх зубах былі высвідраваны амаль ідэальныя адтуліны дыяметрам 1-3 мм і глыбінёй да 3,5 мм.
   У 1790 годзе Джон Грынвуд (дантыст Джорджа Вашынгтона) вынайшаў першую прымітыўную бормашыну з нажным прывадам (для кручэння быў ​​выкарыстаны механізм ад калаўрота).
   На выставе аднаго дня прадстаўлена зубная бормашына з калекцыі Чачэрскага гісторыка-этнаграфічнага музея.

 
 

31.01.2013 |  Выстава аднаго дня. 31 студзеня - Міжнародны дзень ювеліра
   31 студзеня адзначаецца Міжнародны дзень ювеліра.
   Прафесія ювеліра - адна з самых старажытных, бо ўпрыгожваць сябе людзі любілі заўсёды. У былыя часы людзі верылі, што ўпрыгажэнні нясуць пэўны магічны сэнс, што яны абараняюць ад злых чараў, ад засмучэнняў і нават ад фізічных нападаў. Часткова гэтая традыцыя захавалася і па сённяшні дзень.
   На новай выставе аднаго дня прадстаўлены ювелірныя вырабы з буйнейшых беларускіх музеяў: Нацыянальнага гістарычнага музея Рэспублікі Беларуcь (падсвечнікі з Мінскага скарбу), Гродзенскага дзяржаўнага музея гісторыі рэлігіі (брошка, амулет, пярсцёнак), Брэсцкага абласнога краязнаўчага музея (пярсцёнак-пячатка), Магілёўскага абласнога краязнаўчага музея імя Е.Р. Раманава (пярсцёнак), Гродзенскага дзяржаўнага гісторыка-археалагічнага музея (колты, падвеска).

26.01.2013 |  Выстава аднаго дня. 26 студзеня - Міжнародны дзень мытніка
  Міжнародны дзень мытніка штогод адзначаецца 26 студзеня. Менавіта ў гэты дзень, 26.01.1953 года ў сталіцы Бельгіі горадзе Брусэлі пачала сваю працу першая сесія Савета мытнага супрацоўніцтва.
 Упершыню Міжнародны дзень мытніка адсвяткавалі ў 1983 годзе, у трыццацігадовы юбілей Сусветнай мытнай арганізацыі.
   Чарговую выставу аднаго дня Цэнтр Дзяржаўнага каталога Музейнага фонду прысвячае Міжнароднаму дню мытніка. На выставе можна азнаёміцца з дзвюма мытнымі пломбамі ХІХ ст. (Бярозаўскі гісторыка-краязнаўчы музей, Музей гісторыі горада Мінска) і элементамі ўніформы сучасных супрацаўнікаў беларускай мытні (Нацыянальны гістарычны музей Рэспублікі Беларуcь).

17.01.2013 |  Выстава аднаго дня. 17 студзеня нарадзіўся Станіслаў Аўгуст Панятоўскі
  Станіслаў Аўгуст Панятоўскі, апошні кароль польскі і вялікі князь літоўскі (1764—1795), нарадзіўся 17 студзеня 1732 у маёнтку Воўчын (сучасны Камянецкі раён Брэсцкай вобласці).
  Станіслаў Аўгуст - фігура неадназначная ў гісторыі. З аднаго боку ён падтрымліваў прагрэсіўныя рэформы і прыняцце першай ў Еўропе Канстытуцыі (1791), садзейнічаў развіццю літаратуры і мастацтваў. З другога, стаўленік расійскай імператрыцы Кацярыны ІІ быў вымушаны прымаць палітычныя рашэнні пад уціскам Расіі і не змог перадухіліць падзелы і знішчэнне Рэчы Паспалітай.  
  Цэнтр Дзяржкаталога прапануе віртуальную выставу, на якой можна азнаёміцца з бюстам Станіслава Аўгуста Панятоўскага аўтарства Ле Бруна (1784) з калекцыі Гродзенскага дзяржаўнага гісторыка-археалагічнага музея.  
 

16.01.2013 |  Абнаўленне АМС "Музей-5"
 Паважаныя калегі!

  З'явілася абнаўленне для АМС "Музей-5". Для атрымання абнаўлення неабходна звярнуцца ў НПФ "ІНЕАК" па электронным адрасе al_plotkin@mail.ru ці на сайт  ineak.by
  


12.01.2013 |  Выстава аднаго дня. 12 студзеня нарадзіўся Уладзімір Мулявін
  Першую ў 2013 годзе выставу аднаго дня Дзяржаўны каталог прысвячае Уладзіміру Мулявіну, які нарадзіўся 12 студзеня 1941 года.
  Заснавальнік і мастацкі кіраўнік беларускага вакальна-інструментальнага ансамбля «Песняры» з'яўляўся народным артыстам Беларусі (1979), Заслужаным дзеячам культуры Польшчы (1980), народным артыстам СССР (1990), быў узнагароджаны ордэнам Францыска Скарыны (2001).
  На выставе прадстаўлены фотаздымкі Уладзіміра Мулявіна і ўдзельнікаў ансамбля «Песняры», а таксама эскізы іх сцэнічных касцюмаў з калекцыі  Дзяржаўнага музея гісторыі тэатральнай і музычнай культуры Рэспублікі Беларусь.


27.12.2012 |  Віншуем з Калядамі і Новым Годам!
 

15.12.2012 |  Выстава аднаго дня. 15 снежня - Міжнародны дзень чаю
  Міжнародны дзень чаю - неафіцыйнае свята, якое адзначаецца штогод 15 снежня.
  
Ідэя адзначаць «Дзень чаю» лунала ў паветры шмат гадоў, але толькі пасля абмеркавання на сусветных грамадскіх форумах у індыйскім Мумбаі і бразільскім Порту-Алегры, у 2004 і 2005 годзе адпаведна, дата 15 снежня стала называцца «Міжнародны дзень чаю».
 
Мэтай правядзення «Міжнароднага дня чаю» было заяўлена прыцягненне ўвагі грамадства і палітыкаў да праблем продажу чаю, становішча работнікаў чайнай вытворчасці, складанасцяў, якія ўзнікаюць у дробных вытворцаў у барацьбе з вялікімі карпарацыямі, а таксама папулярызацыя гэтага напою ў свеце.
  
У гонар гэтага свята Цэнтр Дзяржаўнага каталога падрыхтаваў віртуальную выставу прадметаў, звязаных з традыцыямі чаявання. Тут прадстаўлены прадметы XVIII - XXI стст.: чайнікі, самавар, кубак і сподак, чайніца, якія захоўваюцца ў Нацыянальным гісторыка-культурным музеі-запаведніку "Нясвіж", Нацыянальным мастацкім музеі Рэспублікі Беларусь, Гродзенскім дзяржаўным гісторыка-археалагічным музеі, Магілёўскім абласным краязнаўчым музеі імя Я. Р. Раманава, Капыльскім раённым краязнаўчым музеі, Чачэрскім гісторыка-этнаграфічным музеі.

1  2  3  4  5  ... 




© "Міністэрства культуры Рэспублікі Беларусь", 2009-2013
© Распрацоўшчык ТAA "НВФ "IНЕАК", 2009